Portugalia është në kërkim të trajnerit të ri, pas largimit të Fernando Santos, për shkak të dështimit në Botërorin e Katarit. Objektivi i parë ishte Zhoze Mourinjo, por trajneri i Romës refuzoi të marrë drejtimin e kombëtares luzitane.
Ka edhe vetëofrime ndërkohë dhe bëhet fjalë për një emër të madh, si Luis van Gal. Holandezi ka dalë hapur, duke thënë se do ta mirëpriste një telefonatë nga drejtuesit e federatës portugeze.
“Jam sërish në pension, por do ta dëgjoja propozimin, nëse do të më thërrisnin. Më shumë nuk mund të them”, – ka deklaruar gjatë një eventi trajneri holandez, që prej vitesh jeton në Portugali.
Van Gal e kishte paralajmëruar largimin nga Holanga pas Botërorit. Ai është i lirë aktualisht dhe duket se e ka me qejf të marrë drejtimin e Portugalisë. Mbetet të shihet tani, nëse drejtuesit e futbollit portugez do ta marrin apo jo në konsideratë si kandidaturë.
